1 Corinthians 3
1 兄弟姊妹啊，老實講，𠊎對你等講話，一旦無看你等做屬聖靈个，係看你等做屬肉體个，係基督信仰个孲𤘅仔。
2 𠊎用乳餵你等，無用飯，因為你等還吂會食飯。就係這下，你等也還毋會食飯，
3 因為你等還係屬肉體个。你等中間有嫉妒，有相爭；這敢毋係證明你等係屬肉體个、行為像一般人嗎？
4 你等中間有人講：「𠊎屬保羅」；也有人講：「𠊎屬亞波羅」。像恁樣，你等同一般人有麼介無共樣呢？
5 總講，亞波羅算麼介？保羅算麼介？𠊎等不過係上帝个僕人，帶領你等相信上帝。𠊎等逐儕係照主个分派來工作：
6 𠊎栽種，亞波羅淋水，總係使它大个係上帝。
7 栽種个㧯淋水个毋算麼介；一切全看使它大个上帝。
8 栽種个㧯淋水个有共一個目標；上帝又會照逐儕个工作報答佢。
9 𠊎等係上帝个同工；你等係上帝个田園。你等也係上帝所起个屋。
10 𠊎用上帝給𠊎个恩賜，像一個內行个工頭打好地基，別人在該頂高起屋。總係，每一個人愛想清楚自家樣般來起。
11 因為上帝已經立耶穌基督做惟一个根基，無人能立其他个根基。
12 在這根基頂高，有人可能會用金、銀、抑係寶石來起；也有人會用樹仔、草、抑係禾稈來起。
13 到審判該日，逐儕个工程好壞全部會顯明出來；因為逐儕个工程攏總愛經歷大火个考驗，來證明工程个品質。
14 經歷考驗以後，所起个工程若還在，該人就會得到獎賞。
15 所起个工程若被火燒掉，該人个損失就盡大；佢本身會得救，總係像對大火底背走出來一樣。
16 敢毋知你等係上帝个殿，上帝个靈住在你等底背嗎？
17 若有人毀壞上帝个殿，上帝一定會毀滅該人；因為上帝个殿係聖个。你等就係上帝个殿。
18 毋好騙自家。你等當中若有人照世間个標準看自家做有智慧，願佢變做戇仔，好成做正經有智慧个人。
19 因為這世間所認定个智慧，照上帝來看反轉係戇檔。像聖經所講：「上帝使有智慧个人中到自家个詭計。」
20 另一節聖經也講：「主知智慧个人所想个係虛空。」
21 所以，無論麼人，毋好因為屬麼人來誇口。事實上，萬有全係屬你等个：
22 保羅、亞波羅、彼得、這世界、生抑係死、這下个事抑係將來个事，這一切全部係屬你等个；
23 你等係屬基督个，基督係屬上帝个。